Kryeministri Berisha i dërgoi sot dy telegrame ngushëllimi Kryeministrit të Republikës Islamike të Pakistanit  Z. Syed Yousuf Raza GILANI, për aksidentin ajror dhe për përmbytjet e mëdha, të ndodhura ditët e fundit në veriperëndim të Pakistanit. 

Në këtë telegram kryeministri Berisha shprehet:

“Me keqardhje  të thellë mësova për fatkeqësitë natyrore të shkaktuara nga përmbytjet dhe shirat e dendura në veri perëndim të vendit Tuaj, nga të cilat janë fshirë fshatra rrugë dhe ura dhe kanë humbur jetën më shumë se 400 persona.

Më lejoni që në këtë moment tragjedie të madhe për vendin dhe popullin Tuaj t’Ju shpreh në emër tim dhe të Qeverisë shqiptare ngushëllimet më të sinqerta, Ju,  Qeverisë Suaj, kombit mik të Pakistanit si dhe të ndaj me familjet e viktimave hidhërimin për këtë humbje të madhe. 

Shqiptarët  bashkohen me lutjen Tuaj dhe të popullit mik të Pakistanit që shpirtrat e tyre të prehen në paqe”. 
 

Kryeministri  i shprehu ngushëllime kryeministrit të Pakistanit edhe për viktimat e aksidentit ajror të ndodhur pak ditë më parë:

“Me keqardhje  të thellë mësova për ngjarjen tragjike të rrëzimit te avionit të linjës Airblue ED-202, në verilindje të Islamabadit,  si pasojë e së cilës gjetën vdekjen 152 persona.

Më lejoni që në këtë moment dhimbje të thellë për familjet e viktimave popullin mik të Pakistanit si dhe Ju e Qeverinë Tuaj, t’Ju shpreh në emër tim dhe të Qeverisë shqiptare ngushëllimet më të sinqerta, Ju,  Qeverisë Suaj, kombit mik të Pakistanit si dhe të ndaj me familjet e viktimave hidhërimin për këtë humbje të madhe. 

Shqiptarët  bashkohen me lutjen Tuaj dhe të popullit mik të Pakistanit që shpirtrat e tyre të prehen në paqe.

Ju lutem pranoni, Shkëlqesi, sigurimet e konsideratës sime më të lartë”.

Sinqerisht Juaji,
SALI BERISHA"